Autor: Administrador

Aberta a convocatoria de axudas, fondo e material escolar para o vindeiro curso 2018-19. Poden consultar a información na lapela AXUDAS LIBROS.

«O corazón, como as cousas que se saben, como os cartos que se gañan, soamente serven para algo se se comparten cos demais»

Mª Victoria Moreno

E 4º de ESO non quixo deixar de celebrar o Día das Letras cunha visita a Ribeira para compartir o noso labor cos maiores da Residencia de anciáns.

Ao longo dunha hora charlamos con eles, algúns deles contáronnos de onde son e como foi a súa vida, ata coñecían a algunhas das nosas familias porque foron veciños! Lémoslles textos da autora homenaxeada, e agasallámolos cunhas letras marcapáxinas. Foi moi emocionante compartir una anaco do noso tempo con eles, que teñen tantas cousas que nos ensinar.

E como remate, nesta semana tamén elaboramos o audiovisual que vos deixamos a seguir.

Esta semana tivemos traballo a fartar. En grupos puxémonos a investigar sobre a orixe desta celebración festiva do 17 de maio e mais sobre a vida e obra da autora homenaxeada: Mª Victoria Moreno. Cando nos quixemos dar conta xa tiñamos o día enriba, así que decidimos compartir o que sabiamos cos máis pequenos do colexio, co alumnado de Infantil. Preparamos un vídeo e agasallámolos cuns globos brancos e azuis, lembrando así as cores da nosa bandeira. Estas son algúns dos momentos desta mañá e tamén vos deixamos o vídeo.

          Agardamos que vos preste!

Os demais grupos de 3º de ESO visitamos as clases de Primaria, falamos con eles, vimos algún vídeo e xogamos a ver quen sabe máis das letras… Foi moi enriquecedor para todos.

Celebramos a apertura do mes de maio, coincidindo co día de Santa Luisa de Marillac, cofundadora das Fillas da Caridade xunto con Vicente de Paúl. Acudimos á capela o alumnado de Infantil, Primaria e Secundaria para así renderlle homenaxe, recordando o seu gran labor no servizo ós máis necesitados.

Comezamos o mes de maio cun pequeno agasallo ás nosas nais no seu día.

Os nen@s de 1º e 2º de Primaria elaborámolos con todo o agarimo que elas se merecen.

Moitas felicidades no teu día MAMÁ !!!

Os alumn@s de 5º e 6º de Primaria asisten a unha representación no Auditorio de Ribeira sobre a vida e obra de María Victoria Moreno, a quen se homenaxea este ano o Día das Letras Galegas.

Hai poucos días comezamos o mes de maio e os nenos/as de 1º de Primaria estivemos moi ocupados preparando o regalo da NAI, que se celebrou o pasado domingo 6. Esta é unha mostra dos agasallos que fixemos, incluída a bolsa de agasallo.

Como broche de ouro para rematar o mes de abril, os nenos/as do Primeiro Ciclo da Primaria tivemos unha saída cultural á Casa Grande de Xanceda. Alí fixemos unha ecovisita guiados por María e Isabel, que nos ensinaron os encantos e recunchos da enorme finca que alberga a Casa de Xanceda. Tamén visitamos as cortes,  sala de muxir , a horta e o eco- zoo. O mellor de todo é que aprendemos a muxir a vaca Rosalía,  que tivo moita paciencia con nós.