CPR PLURILINGÜE LA MILAGROSA-JOSEFA SOBRIDO

Na clase de 2º de primaria realizamos unha actividade moi divertida: Somos Piratas!

A través dunha páxina web eliximos rutas e imos facendo os exercicios que nos piden. Resulta moi divertido, porque ao acabar unha ruta conseguimos un anaco de mapa, para chegar a un tesouro que se agocha no patio.

Empregamos a aprendizaxe cooperativa para realizar as tarefas en grupo. E as tarefas están deseñadas coas intelixencias múltiples e a taxonomía de Bloom, pero non deixan de ser actividades de lingua castelá de segundo de primaria. Repasamos moitos contidos.

O tesouro eran moedas de chocolate, repartimos unha para cada neno e nena.

O vindeiro domingo conmemórase o Día do Libro, polo que levamos uns días en 3º e 4º de ESO a preparar esta data tan significativa. Quixemos adicarllo ao recentemente desaparecido escritor galego Agustín Fernández Paz. Traballamos cos seus libros «A neve interminable», «Cartas de inverno», » As fronteiras do medo» ou «Corredores de sombra» e profundamos un pouco na súa biografía, obras publicadas, ou premios acadados ao longo de toda unha vida como mestre e narrador. No corredor de Secundaria prepraramos unha pequena exposición coas súas obras e os traballos realizados polo conxunto do alumnado para a ocasión.

Para rematar, este venres fixemos unha lectura para os compañeiros, dun dos capítulos do libro de misterio «A neve interminable».

A toda a comunidade educativa: feliz día do libro!

O venres 7 de abril os alumnos e alumnas do terceiro ciclo de Primaria disfrutaron dun día lúdico no parque Galipark de Padrón, onde realizaron múltiples actividades.

O obxectivo desta xornada foi fomentar a vida saudable , o traballo en equipo e as relacións sociais.

Como remate os nenos e nenas participaron nunha clase de reanimación RCP a cargo do mestre de Educación Física, onde tomaron conciencia da importancia de actuar con rapidez e cunhas nocións de primeiros auxilios.

Esta mañá en 3º e 4º de ESO dispuxémonos a preparar o vindeiro Día do Libro. Á volta de vacacións adicaremos este día ao desaparecido autor Agustín Fernández Paz, polo que estamos a ler algunhas das súas obras: «Cartas de inverno», «As fronteiras do medo», «Corredores de sombra» ou «A neve interminable».

Destas lecturas daremos boa conta nunha celebración nas próximas datas. De momento estamos deixando voar a imaxinación e como vedes, estamos feitos uns artistas!

O pasado luns, 3 de abril, os alumnos dos dous primeros ciclos da primaria acudiron ao Teatro «SALESIANOS» na cidade olívica.

Alí viron representada a obra PETER PAN, unha adaptación moderna, divertida e en inglés que fixo disfrutar a nenos e mestres.

Unha vez rematada a obra os nenos e mestres desfrutaron da comida no Fogar San José, que as Fillas da Caridade teñen nesta cidade. Despois da comida disfrutaron dun momento de lecer, de xogos e convivencia cos seus compañeiros.

Os alumnos e alumnas de 1º e 2º da ESO pasamos o día na Coruña para disfrutar da física e da ciencia. Pola mañán visitamos a Casa das Ciencias onde nós mesmos puidemos probar os experimentos, logo, asistimos ao Planetario no que nos explicaron a nosa Galaxia.

Ao rematar fomos á DOMUS onde comemos e puxemos a proba a nosa maña e intelixencia. Alí vimos unha pelicula en 3D chamada «Os Pequenos Xigantes».

Despois fomos ao centro comercial Marineda City onde disfrutamos do noso tempo libre.

Grazas Libertas.

Non podemos expresalo doutra maneira, máis que coas grazas, grazas e mil grazas por darnos a coñecer dunha maneira tan orixinal e atrevida a todas a esas persoas e obras que nalgunha época, continente… estiveron censurados polas súas ideas ou  temática.
Metéstenos o gusanillo por seguir afondado no tema.
Bravo.

A semana pasada, co motivo do día da árbore, alumnos de primaria plantaron unha camelia e varios castiñeiros nos terrenos do colexio. Aquí vemos a alumnos de 4º da ESO abrindo o burato para a camelia.

Os alumnos de 1º de EP coa camelia xa plantada.

Alumnos de 3º ESO preparando os buratos para os castiñeiros. O terreno estaba moi duro, e as ferramentas levaban moito tempo sen usar……….

Os alumnos de 4º de EP plantando os castiñeiros,  coa supervisión do técnico forestal da zona.

Durante estos dous primeiros días da pasada semana os alumnos da Primaria puideron disfrutar do Taller de Animación a Lectura da Ed. Edebé, onde  disfrutaron das anécdotas dos libros, fixeron representacións e simulacións das personaxes dos libros, xogos…

Con estas actividades, non lles quedou dúbida de que ler é unha actividade divertida.

En decembro un grupo de alumnos de 4ESO enviamos cartas a compañeiros do Colexio Simón Bolivar, nos campos de refuxiados saharauís. Aproveitamos a visita á familia que fixo Larusi, un rapaz que estuda en Ribeira, para que as levara. E viñeron de volta grazas a Ramón «Filipino» cando foi en febreiro a correr o Sahara Maratón. Recibimos a resposta, lemos e compartimos as cartas cos compañeiros de clase e agora coñecemos mellor a realidade dun pobo que só quere regresar ao seu país.