Na mañá de onte, puidemos asistir á charla impartida por axentes da comisaría da Policía Nacional de Ribeira. O tema era moi importante, xa que as novas tecnoloxías ademais de seren unha boa ferramenta para coñecer e aprender, tamén hai que saber usalas. Ademais de explicarnos os perigos que podemos atopar pola rede, resolvéronnos todas as nosas dúbidas. Moitas grazas por vir!
O vindeiro xoves 16 de abril, terá lugar unha sesión infomativa, que está dentro do Plan Director para a convivencia e mellora da seguridade nos centros educativos. A tema será: INTERNET E OS SEUS RISCOS. Será impartida por membros da comisaría da Policía Nacional de Ribeira, ás 12:00 horas no salón de actos do colexio.
Esperando que a temática sexa do seu agrado, quedan convidados a esta sesión.
Xa se pode consultar a listaxe provisional de admisión de alumnos no apartado: ADMISIÓN DE ALUMNOS
Esta semana comezamos cunha actividade moi interesante. O escritor Alfredo Gómez Cerdá achegouse ata o cole para falar cos rapaces de 3º ciclo de Primaria sobre os libros que xa leran con anterioridade: «El jefe de la banda» y «El volcán del desierto».
Puidemos conversar con el e ademais facerlle moitas preguntas sobre os personaxes, os libros e a inspiración.
Foi unha experiencia moi gratificante e pasámolo xenial!
Os alumnos de 5º e 6º de Educación Infantil fomos de excursión cultural e de ocio á Casa do Queixo. Que nervios antes de subir no autobús!
Cando chegamos, recibíronnos os monitores que eran moi amables e simpáticos e dispuxémonos a pasar un día cheo de sorpresas para nós. Fixemos unha morea de actividades e aprendemos moitas cousas!
No taller de queixo puxémonos mans á obra e aquí vedes que ben se nos daba preparalo. Todos quixemos axudar, así que agora xa sabemos facer queixo artesanal … estaba riquísimo!
Tamén participamos nunha aula de reciclaxe, explicáronnos moitas cousas novas, despois de moito traballar quedounos así de ben. Foi moi divertido!
Unha parte especial da nosa saída foi a visita ós animais da granxa-zoo. Que grandes eran! Estivemos moi atentos porque o día estaba sendo emocionante.
E para rematar, tamén fixemos a Ruta do Muíño Encantado. Que fermoso camiñar polo campo, escoitar os paxaros e coñecer un lugar diferente!
Chegou a hora de voltar, xa que as nosas familias agardaban por nós. Subimos ó autobús e volvemos supercontentos para a casa. Pasámolo moi ben!
O 4 de marzo os alumnos de 4º de Primaria realizamos unha saída á Exposición do Santa Isabel en Ribeira. A experiencia foi moi gratificante e fomos tomando nota de todo o que Pilar, a comisaria da mostra, nos ía contando.
O certo é que nos atopabamos moi nerviosos e inquedos, e non parabamos de facer preguntas. Máis que unha visita guiada, semellaba unha entrevista en toda regra. Aproveitabamos calquera recuncho e oportunidade para resolver as nosas dúbidas, e competiamos entre nós para ver quen resultaba ser o mellor periodista.
As ferramentas e a maqueta empregadas na construción do buque parecéronnos realmente grandes, e moi complicadas de empregar. Sen embargo, as diferentes maquetas, onde descubrimos o pouco número de botes salvavidas que levaba o barco, semellaron realmente pequenos.
Tiñamos moito interese en poder ver un camarote de primeira clase, pero o que máis nos impactou foi o relato do fillo dunha das heroínas e as traxedias sufridas por algunhas familias en particular, que viron como os seus soños dunha nova vida ficaban varados nas costas de Sálvora.
Cheos de ideas e bos propósitos, voltamos ao colexio pensando en como darlle forma ó noso proxecto.
Como esperamos sexa do agrado de moitos, iremos dando conta das nosas pescudas.
O Coro do colexio, que está integrado por alumnos e alumnas dos cursos de 3º de Primaria ata 4º da ESO, participamos este sábado 21 de marzo na edición XXVI do Festival da Canción Misioneira. O encontro tivo lugar no colexio Sagrado Corazón de Castiñeiras e a profe Sara preparou con nós «Sobreviviendo». Foi xenial!
Convidados polo Concello, os alumnos de 3º e 4º da ESO asistimos ao concerto dos cantautores Juan Dorá e María Villalón. Foi unha mañá moi agradable escoitando fermosas cancións!
A Consellería de Educación acaba de anunciar no DOG do 16 de marzo, as axudas para a realización de actividades de formación en linguas estranxeiras e que van dirixidas a alumnos que cursan actualmente algún curso da ESO ou Bacharelato.
Os solicitantes ademais, deberán ter superadas todas as materias no curso 2013/14 e unha nota mínima de ben ou 6 na área de lingua inglesa.
Poden descargar o DOG neste enlace ou o cartel informativo.
Os nenos /as do primeiro ciclo da primaria comezámolo mes de marzo dun xeito divertido xa que o luns tivemos unha tarde de contacontos, onde a coñecida Raquel Queizás nos deleitou co seu espectáculo: “O autobús da selva”, onde nos contou ese conto e outro máis que tiña como valor principal a diversidade e a aceptación da mesma.
Estivemos moi atentos e fomos moi bos actores e actrices: bailamos, xogamos con sons e con xestos…. Foi moi moi divertido, pero… Quen o pasou mellor?
